Сите животни не се подеднакво чувствителни на високите температури. Оние со висок ризик од топлотен стрес ги вклучуваат:
-младите животни
-животните со потемна боја
-животните кои биле болни или имале проблеми со респираторниот систем.
Исто така, во врска со толеранцијата на високите температури треба да се внимава на следново:
–Свињите се многу чувствителни на топлински стрес и изгореници и не треба да бидат изложени на долготрајна директна сончева светлина или екстремни температури. Веќе над 25°C, обезбедете им доволно вода и кал. Избегнувајте да ги транспортирате при вакво време.
–Овците кои се острижени се изложени на ризик од топлотен стрес и изгореници од сонце поради недостаток на топлинска изолација обезбедена од волната.
-Високопродуктивните млечни крави се повеќе погодени од екстремните горештини отколку помалку продуктивните.
–Говедата во лактација се почувствителни од останатите поради дополнителната метаболичка активност која се јавува во тој период.
-На говедата со црни влакна повеќе им пречи директното сончево зрачење отколку на оние со посветли. Исто така, оние со кратки влакна и светла кожа се во опасност од изгореници.
-Расата Холштајн е помалку толерантна од расата Џерси.
-Британските раси на овци и говеда се помалку толерантни од Мерино или говедата чие потекло е од тропски и суптропски краеви.
-Тешките говеда над 450 кг се почувствителни од полесните.
-Говедата, алпаките и ламите се посклони на топлотен стрес отколку овците и козите.
Знаци на топлотен стрес
Ако имате некои од овие видови животни, внимателно следете ги поради знаци на топлотен стрес, кои вклучуваат:
-задишаност
-забрзано дишење
-зголемен внес на вода
-губење апетит
-безволност или летаргија
-зголемено лачење на плунка
-во тешки случаи, животното може да се онесвести.
Како да им помогнете да се разладат?
Во случај на топлотен стрес на животните помогнете им да се разладат.
Веднаш преместете ги во сенка, по можност некаде каде што има промаја. Ако не можат да се движат, обидете се да ги подигнете и да ги преместите или направете сенка над нив.
Понудете им многу ладна, чиста вода и поттикнете ги да пијат почесто, во помали количини. Попрскајте ги со ладна вода, особено на нозете и копитата или ставете ги во вода. Користете прскалки или црева за говедата, свињите и коњите. Над нив ставете влажни крпи. Кучињата и мачките може да се стават во кофи/корита со ладна вода. Живината не треба да се навлажнува освен ако не дува ветер што ќе помогне во процесот на ладење.
Зголемете го движењето на воздухот околу нив со вентилатори, вентилација или ветер (промаја). Намалете го бројот на животни за да им овозможите простор да лежат.
Ако животното не покажува знаци на подобрување, обратете му се на ветеринар за помош.
