Европската комисија го објави Предлогот за првиот закон за мониторинг на почвата со цел да се заштити, обнови и да се обезбеди нејзино одржливо користење.
Целта е да се обнови здравјето на почвата во земјите членки на Европската Унија до 2050 година. До 70 отсто од површините се оквалификувани дека се во лоша состојба, а над 80 отсто содржат остатоци од пестициди, се вели во соопштението на Комисијата.
Процесите на деградација се одвиваат премногу брзо и го губиме ресурсот од кој зависиме. На неа се одвива повеќе од 25 проценти од биолошката разновидност и е неопходна за да се спречи нејзиното губење. Клучна е за обезбедување здрава храна. Деградацијата влијае на земјоделското производство, плодноста, здравјето на посевите, нивната отпорност на болести и штетници и нутритивниот квалитет на храната.
Научните докази покажуваат дека се случува понатамошна деградација поради неодржливото управување, урбанизацијата, контаминацијата и прекумерната експлоатација, во комбинација со влијанието на климатските промени и екстремните временски појави. Загуби кои произлегуваат од тоа ја чинат Унијата 50 милијарди евра годишно.
Новиот закон има за цел да одговори на клучните закани за овој ресурс во ЕУ, како што се ерозија, поплави и лизгање на земјиштето, губење на органски материи, салинизација, контаминација, набивање, бетонизација и губење на биолошката разновидност.
Законот ќе се спроведува етапно, почнувајќи со воспоставување рамка за следење на почвата и проценка на состојбата во земјите членки за да може да се преземат мерки за обновување на деградираните подрачја. Одржливото управување ќе стане норма на ниво на Унијата. Членките ќе треба да дефинираат кои практики треба да ги спроведуваат управителите на почвата, а кои треба да бидат забранети бидејќи предизвикуваат деградација.
Ќе се бара идентификување на потенцијално контаминирани локации, спроведување истраги на локацијата и справување со неприфатливите ризици по здравјето на луѓето и животната средина, придонесувајќи за животна средина без токсичност до 2050 година. Постојат над три милиони потенцијално контаминирани локации низ ЕУ кои се резултат на индустриско загадување.
Предлогот се упатува на расправа до Европскиот парламент.
