Под покровителство на Општина Дојран на градскиот пазар во Нов Дојран и оваа година се одржа традиционалниот фестивал на храна, обичаи и култура „Дојран Гурман Фест“.
„Гурман фест“ е традиционален гастрономски настан, на кој се презентира кулинарското наследство со специјалитети од дојранско и неговото богато поднебје.
На традиционалната манифестација која вчера вечер се одржа на градскиот пазар во Нов Дојран, се изведе драмата – „Маалска кавга“ која им е добро позната на Дојранчани.
Драмата датира од многу одамна, преработена е и дополнета според книгата на Ристо Тасев – „Дојране, ах мој Дојране“.
Во драмата се негува дојранскиот дијалект, и на еден смешен и шеговит начин е прикажан секојдневниот живот на дојранчани во минатото.
„Несомнено, оваа драма е дел од богатата културна ризница со која општина Дојран се гордее.
Голема благодарност до Кети Неделкоска и Ленче Илкова за посебниот придонес за драмата, кои беа во улоги на Мара и Љопа и ги разбудија спомените на дојранчани од старите времиња.“, рече градоначалникот на Општина Дојран, Анго Ангов.
Домаќин на настанот беше Здружението на жени – „Дојрана“ од Дојран.
