Бразилското Министерство за земјоделство прогласи „вонредна состојба за здравјето на животните“ низ целата земја, бидејќи случаите на птичји грип се откриени кај дивите птици.
Мерката, која ќе биде во сила 180 дена, има за цел „да се спречи (болеста) да влезе во производството на живина, како и да се зачува дивата фауна и флора и здравјето на луѓето“, се вели во соопштението на бразилското Министерство.
-Ова овозможува мобилизирање на ресурсите за да се спречи ширењето на вирусот. Забранети се и саеми, натпревари и живинарски изложби – додаваат од министерството.
Бразилските власти соопштија дека откриле три нови случаи на птичји грип, со што вкупниот број регистриран во земјата од средината на мај се искачи на осум. Сите случаи се однесуваат на диви птици во неколку области низ Бразил.
Бразил е најголемиот светски извозник на пилешко месо со 35 отсто од пазарот, според податоците на Бразилското Министерство за земјоделство од 2022 година.
Птичјиот грип е причина за високата смртност кај дивите птици и живината. Оваа болест е ретко забележана кај луѓето и обично се јавува преку близок контакт со заразени птици.
