Пченицата на полињата во Србија е зафатена од ретката болест жолта ‘рѓа, која се „шири како шумски пожар“ со веќе видливи оштетувања, изјави за Beta експертот за пченица Мирослав Малешевиќ.
Малешевиќ вели дека оваа болест која ја уништува лисната маса – ретко се појавува во Србија и дека е карактеристична за медитеранските земји. Се развива во услови на нагли пролетни температурни флуктуации, придружени со дожд и снег.
„Жолтата рѓа се шири со неверојатна брзина, како пожар и за два-три дена може да го нападне посевот на целата нива. Последен пат во Србија се појави во 2014 година, кога направи значителна штета“, вели Малешевиќ.
Фото/springer.com
Тој додава дека ниту еден вид пченица во Србија, ниту во Европа, не е отпорен на оваа болест. Посебно е опасно за пченицата која не е добро прихранета или не е декларирана, туку нивите се посеани со непроверени семиња. Вели дека може да се процени колкава ќе биде штетата, но дека уште „не е сè загубено“ доколку пченицата веднаш се третира со заштитни средства. Иако нивната ефикасност не е иста, постојат препарати со висок степен на сузбивање на болеста.
Претседателот на Независното здружение на земјоделци во Србија, Јовица Јакшиќ изјави дека жолтата ‘рѓа се шири „со неверојатна брзина“ и дека пченицата денес изгледа добро, а веќе следниот ден пожолтува.
