Приближно 10.000 хектари површини за одгледување јаболка во Унгарија би можеле да исчезнат во следните пет години, делумно поради тоа што не се исплати да се продолжи со главно застарените методи на одгледување, изјави претседателот на „FrutVeba“, Ференц Апати, за унгарското InfoRadio.
Апати вели дека вкупната берба на унгарските јаболка била 280.000 тони, што е значително помалку од 2021 година, иако според него, тоа не може да се нарече голема берба, барем не блиску до производниот потенцијал на Унгарија од 600.000-650.000 тони, пренесе 24.hu.
Примарна причина за загубата на родот се временските прилики, иако во 2022 година јаболката не биле уништени од мраз, туку од претходната суша.
Покрај временските услови, причина за намалувањето на родот е и тоа што во периодот од пет до осум години континуирано се намалува унгарската површина за одгледување јаболка, а земјоделците имаат се помалку извори на финансирање.
Апати смета дека во иднина уште повеќе луѓе ќе се откажат од одгледувањето јаболка, бидејќи пред три години површината за одгледување јаболка била 25.000 хектари, лани 22.500 илјади хектари, а годинава нема да биде повеќе од 20.000 – 21.000 хектари.
Според него, системот на еко-субвенции сè уште одржува во живот многу застарени насади. Тој смета дека не вреди да се трошат пари на застарени плантажи, туку фокусот да се стави на подобрувања.
Според Апати, во следните пет години ќе исчезнат 10.000 хектари од сегашната површина за одгледување јаболка од околу 21.000 хектари, кои треба што поскоро да бидат заменети со нови, модерни насади.
