Обработливите површини посеани со пченица оваа година надминаа 220 милиони хектари ширум светот, пишува UkrAgroConsult. Неколку развиени региони се одговорни за 50 отсто од вкупното светско производство на пченица и 53 отсто од вкупната ожнеана површина.
Околу 70 отсто од глобалното производство на оваа култура се користи за храна, 20 отсто за сточарство и два до три отсто во индустрискиот сектор. Побарувачката за оваа житарка се зголемува како што расте популацијата. Големината на пазарот во 2021 година е проценета на 127,7 милијарди долари и се предвидува да достигне 169,1 милијарди долари до 2027 година.
Зголемената потрошувачка и зголемената побарувачка од преработувачката индустрија за производи како што се брашно, тестенини и пијалаци се очекува да го поттикнат пазарот во наредните години. Тој раст може да биде забавен од фактори како што се зголемената свест за алергиите и чувствителноста на глутен и неизвесните временски прилики.
Петте најголеми производители на пченица во 2022 година, според Indexmundi, кои ги обезбедува Министерството за земјоделство на САД, се:
- На прво место е Кина со производство од 138 милиони метрички тони. Заедно со оризот и пченката, таа сочинува 90 отсто од вкупните прехранбени производи во најнаселената земја во светот со население кое надминува 1,4 милијарди.
- Европската Унија е рангирана на второ место со производство од 134,7 милиони метрички тони. Ова е вкупното производство за сите 27 членки.
- Со 103 милиони метрички тони, Индија е на трето место. Таа е меѓу петте најголеми производители на пченица, ориз, шеќерна трска, кикирики, зеленчук, памук и овошје. Таа е меѓу најголемите светски производители на млеко, јута и мешунки.
- Русија има најголема површина од 17.098.242 km², а на голем дел се произведуваат житарки. Нејзиното производство се проценува на 91 милион метрички тони пченица, од кои ќе извезе 43,7 милиони тони.
- САД имаат годишно производство од 44,9 милиони метрички тони. Вредноста на извозот на пченица во октомври 2022 година падна на 771 милион долари од 1.024 милиони долари во септември 2022 година.
Потоа следат Канада (35 метрички тони), Австралија (33 метрички тони), Пакистан 26,4 метрички тони), Украина (20,5 метрички тони), Аргентина 17,5 метрички тони), Турција (17,25 метрички тони), Обединетото Кралство (14,6 метрички тони), Иран (13,2 метрички тони), Казахстан (13 метрички тони), Египет (9,8 метрички тони), Бразил 9,2 метрички тони), Узбекистан (6,6 метрички тони), Етиопија (5,7 метрички тони), Авганистан (4,5 метрички тони), Алжир (3,7 метрички тони).
*(Во САД се користи називот „метричка тона“ за да се избегне забуна со „кратката“ тона. Метричката тона се зема како маса од 1000 килограми)
