Во тек се градежните работи од проектот „Реконструкција на два пристапни патишта до земјоделско обработливо земјиште во општина Демир Капија“, информираше демиркапискиот градоначалник Лазар Петров.
– Проектот е реализиран со поддршка од Центарот за развој на Вардарски плански регион, а финансиски поддржан преку Програмата за капитални субвенции за развој на планските региони во областа на земјоделството и руралниот развој. Со овој проект планираме да се олесни пристапот до земјоделски обработливи површини во општина Демир Капија, во вкупна должина од 1750 метри, со што ќе се овозможи зголемување на земјоделската активност, зголемување на приносите и приходите од земјоделието и подобрување на локалниот и регионалниот економски развој, соопшти градоначалникот.
Тој појасни дека со овој проект се реконструраат пристапниот пат до обработливата површина во месноста СЕЛО – КО Демир Капија, со должина од 1200 метри и пристап до 60 хектари обработливо земјоделско земјиште, пристапен пат до месноста Света Петка – КО Демир Капија, со должина од 550 метри. Проектот е со вкупна вредност од 719.407,65 денари.
