Триесеттина локални производители на храна и рачни изработки денеска ги презентираа своите производи во холот на Факултетот за туризам и угостителство во Охрид на Фестивалот на локални производи „Купувај локално“. Организатори на настанот се Општина Охрид и Факултетското студентско собрание на Факултетот за туризам и угостителство, а целта е вмрежување на локалните производители меѓусебе, со хотелиерите и со студентите.
Професорката Ангела Паскуале посочи дека со овој проект сакаат да ја издигнат свеста кај локалното население да ја почитува локалната храна.
– Тоа е единствениот начин да го зајакнеме нашиот регион и да го одржиме, зачуваме и презентираме нашиот идентитет. Целта на настанот е вмрежување на локалните производители меѓу себе за да можат да ги разменуваат своите производи, вмрежување на локалните производители со хотелиерите, но и со студентите, истакна Паскуале. Забележа дека има ресторани, кои имаат одредено производство, но немаат производство на сирење, преку вмрежување со производителите може некој што произведува локално сирење да го даде во ресторанот и сите производи што ги нуди да бидат со локално потекло.
– Со фестивалот на локални производи сакавме на едно место во исто време да ги собереме сите и да покажеме дека Охрид има што да покаже, но дека нивното вмрежување е слабо и тоа треба да го зајакнеме. Се надевам дека ќе прерасне во Божиќен саем или Фестивал, кој ќе се одржува традиционално пред Нова година, како во многу туристички места и ќе биде атракција за туристите да пробаат и купат локални производи, изјави Паскуале. Деканот на Факултетото за туризам од Охрид Снежана Дичевска смета дека е неопходно јакнење на свеста за значењето и придобивките од купување локални производи.
– Придобивките се огромни. Се поттикнува економскиот развој се влијае врз намалување на невработеноста, се иницира само вработување и вработување на членови од семејството. Но, секторот на мали бизниси нема премногу финансиски средства на располагање да вложат во пропагандна кампања, па ова е одлична можност за нивна промоција, истакна Дичевска.
Градоначалникот Кирил Пецаков, фестивалот „Купувај локално“ го гледа како уште еден настан, кој ќе прерасне во традиција и во иднина ќе привлекува туристи, а Охрид ќе го промовира како туристичка дестинација, која покрај другите содржини ќе понуди традиционална охридска храна и специјалитети карактеристични за овој регион.
– Се надевам дека овој настан ќе добие традиционален карактер и дека значително ќе допринесе во промоцијата на традиционалната храна и домашните производители, затоа што се она што е домашно – наше е највкусно и најубаво, рече Пецаков. Факултетот за туризам и угостителство, нагласи, покажува вистинска иновативност со организација на вакви настани и ја поттикнува креативноста кај студентите.
– Преку ова случување се едуцираат и поттикнуваат граѓаните да се определат за купување и јадење локална храна, која се произведува на традиционален начин што е многу поздрава од се друго што се нуди на пазарот. На овој начин се промовираат приказните на локаолните производители, кои и тоа како имаат што да кажат и пренесат, истакна градоначалникот. Според Игор Пешевски од студентското собрание на Факултетот за туризам и угостителство во Охрид, многу е тешко да ги натераат производителите да дојдат да се претстават, бидејќи немаат доволно работна сила и треба да ги затворат своите работилници и дуќани за да можат да излезат.
– Апелирам до сите да работите со вашите производители, да купувате локални продукти од нив, а не увозни и да си помогнеме еден на друг да опстане нашата македонска традиција, порача Пешевски. Меѓу изложувачите беше и 82-годишната Љубица Лешоска од Вевчани, која изработува везени и плетени фолклорни ракотворби, но тажна е што никој од нејзиното семејство не го наследил занаетот.
– Рачни ракотворби изработувам од мала. Почнав со плетење, па со ткаење и до денеска ткаам. Многу ми е тешко што нема занаетот кој да го наследи. Децата и внуците не се интересираа да научат, вели Лешоска нагласувајќи дека интерес за нејзините изработки има.
На фестивалот „Купувај локално“ презентирани се охридски специјалитети: комат, ѓомлезе, леб под сач, макала, намази, домашни вино и ракија, филигрански изработки, ткаени, плетени и везени ракотворби. Во рамките на проектот изработени се и гифт боксови од локални производи, кои можат да бидат одличен новогодишен подарок.
