Речиси 80 отсто е откупен тутунот од годинашнава реколта и се потврдуваат најавите дека откупот ќе заврши до крајов на месецот.
Менде Стомнароски, претседател на Сојузот на земјоделските здруженија на Македонија вели дека не се памети досега за еден месец да се преземе родот. Има голема побарувачка, а помалку тутун.
– Не паметам, ниту пак повозрасните, дека некогаш се случило тутунот да се откупи за еден месец. Утре, 15 декември е официјалниот старт на кампањата, а веќе 80 насто од родот е купен. Сите откупувачи побрзаа да почнат во почетниот, „предвремен“ рок, 15 ноември. Се потврди она што цело време го говоревме дека малку има тутун годинава, а побарувачката е голема. И е квалитетен. Откупени се над 15.000 тони, а реколтата има неполни 20.000 тони. Нема никаков проблем со откупот, дури, главно, се проценува прва класа, по 300 денари за килограм, изјави Стомнароски за МИА.
Тутунопроизводителот Љупчо Талески од Прилеп има род од еден и пол тон, дел донесол на откупниот пункт, а друг дел е за утре. Задоволен е од проценката.
– Тоа што го донесов на вага ми помина прва класа, по 300 денари. Така прават цела недела откупувачите. Очигледно им треба тутунот, а и квалитетен е. Немам забелешки на процената, но друго прашање е цената по класи која треба да биде реална за да го одржи тутунопроизводството. Ние ќе садиме тутун и наредните години, ама младите не се заинтересирани, вели Талески.
Стомнароски потврдува дека треба да се постигне реална цена за исплатливоста на сите трошоци во производството, за тутунот да остане рентабилен.
– Токму затоа, веднаш по завршувањето на откупот ќе седнеме на преговори со компаниите за наредната реколта, зашто реалната цена ќе го направи одржливо и рентабилно производството за тутунот да остане на нивите. Ако им се исплаќа, и младите генерации ќе го произведуваат, вели Стомнароски.
Тутунот се купува на преку 180 пункта во државава. Од земјоделскиот инспекторат велат дека досега се преземени 15.500 тони тутун, а реколтата ја проценуваат на 21.000 тони. Просечната цена е 285 денари за килограм. Според цената, ќе бидат повисоки и субвенциите.
