Катар, кој е актуелен месецов поради Светското првенство во фудбал, е многу мала земја која се наоѓа на Арапскиот Полуостров во Југозападна Азија и зафаќа површина од 11.581 км2. Во економијата доминира нафтената индустрија, а приходите од продажбата на нафта овозможија да се зголеми животниот стандард во таа земја, која е една од економски најразвиените во светот.
Поради неповолните климатски услови, земјоделството е слабо развиено. Најважно е одгледувањето на урми. Пред да биде откриена нафтата во 1939 година, нивната економија се засновала на риболов и потрага по бисери, бидејќи морето околу Катар содржи некои од најголемите светски живеалишта на бисерни школки.
Во продолжение прочитајте десет интересни факти од катарскиот земјоделски сектор:
-Според податоците на Светска банка, Катар има само 1,22 отсто обработливо земјиште или 14.000 хектари, што е само 0,01 отсто по глава на жител.
-Сместен во најсувиот регион во светот, оваа земја е подложна на тешки климатски услови со екстремно мала количина врнежи. Сепак, Катар произведува урми, зеленчук, житарки, овошје, месо, риба, млечни производи и добиточна храна.
-Најмногу увезуваат од земјите на Блискиот Исток, а потоа следат Европската Унија, САД, Југоисточна Азија, Австралија и Нов Зеланд.
-Увозот на свежо месо е забранет од Бразил и ЕУ, со исклучок на: Холандија, Франција, Бугарија, Германија, Шпанија. Забранет е увоз на свежа живина од САД, Виетнам, Филипини, Тајван, Тајланд, Нигерија, Индија, Канада, Иран, Кина и Бугарија. Сите намирници се целосно забранети доколку се од Гвинеја, Сиера Леоне и Либерија.
-Домашното производство на зеленчук во 2021 година изнесувало 102.000 тони.
-Во 2022 година, Катар достигнал самодоволност во производството на бројлерски пилиња.
-Вкупниот број на животни лани изнесувал 1.507.543, од кои 108.749 камили, 42.139 крави, 418.525 кози и 938.130 овци.
-Околу 22.000 камили се користат исклучиво за трки.
-Пчеларите поседуваат 7.313 кошници со пчели.
-Има 76 фарми кои одгледуваат урми. Се проценува дека има нешто помалку од 700.000 стебла. Во 2021 година произвеле 27.000 тони урми.
