Сушата годинава веројатно имаше најголемо негативно влијание врз пченката. На некои места жетвата ќе потфрли и до 50 отсто, некои сорти созреале порано од вообичаено, па бербата почнала порано. Поради недостигот на дожд, на растенијата хронично им недостасувала вода, кочаните биле помалку развиени, зрната останале пократки, а содржината на сува материја била висока.
Но, освен тој проблем, ваквата состојба предизвикана од сушата ќе влијае и на производството на културата што ќе се сее на површината каде што растела оваа житарка.
Имено, поради недостаток на влага во почвата, некои хербициди се уште не се целосно разградени, поради што изборот на култури за нова сеидба ќе биде ограничен, пренесува Agrarheute.
„Доколку помеѓу примената на хербицидот и сеидбата на следната култура паднат помалку од 120 l/m² врнежи, може да се очекува намалена стапка на распаѓање“, велат експертите од Услужниот центар за рурални области од Битбург, DLR.
Ова првенствено се однесува на почвите кои биле третирани со хербициди од групата на сулфонил уреа и трикетони. Проблемот ќе биде најизразен во подрачјата каде што од јуни наврнале помалку од 25 l/m² дожд.
Соодветни култури
Се препорачува да не се сее маслодајна репка, јачмен и детелина за да се избегне оштетување. Се советува одгледување на зимска пченица, а кај зимскиот јачмен се препорачува длабинско обработување на земјштето.
Во случај да е применета активната супстанција мезотрион, не се препорачува одгледување мешунки следната година. По пченката, површината мора да се зазелени со соодветен покривен посев, доколку се планира следната година да се одгледуваат летни култури.
