Можно е да се рестартира извозот на амонијак од Русија преку Украина, во што посредуваат Обединетите нации. Овој потег би можел да го стабилизира јулскиот договор со кој украинските земјоделски производи се извезуваат преку Црното Море, пишува Ројтерс.
Амонијакот е клучната состојка во азотните ѓубрива, а цевководот што го транспортираше од рускиот регион Волга до украинското пристаниште Одеса беше затворен уште во февруари.
Обединетите нации предложија амонијакот, во сопственост на рускиот производител на ѓубрива Uralchem, со гасовод да се донесе на руско-украинската граница. Таму би го преземал Trammo, глобален продавач на мало на овој вид стока, со седиште во САД.
„Недостигот на амонијак, кој претходно беше испорачан преку Украина, на пазарот на земјите зависни од него, предизвика значителни потешкотии. Веруваме дека континуираната испорака ќе помогне да се стабилизира цената на ѓубривата низ целиот свет, со цел да се избегне глобална криза за храна“, рече извршниот директор Ед Вајнер.
Договорот би ѝ дал на Русија причина да се придржува до јулскиот договор за извоз на житарки од Украина, кој треба да биде обновен во ноември.
Претседателот на Русија, Владимир Путин, неодамна го критикувал овој документ и се заканил со ограничувања. Тој се пожалил дека извозот од Русија е отежнат, додека стоката од Украина, според него, не оди во сиромашните земји туку во Турција и во Европската Унија.
Треба да се напомене и дека минатата недела министрите за енергетика на земјите членки на ЕУ одржаа состанок за актуелната енергетска криза, а во врска со неа и падот на производството на азотни ѓубрива.
Како што знаеме, поради најавата за затворање на многу хемиски фабрики, ќе има дополнително поскапување на пазарот. Како што пишува рускиот портал специјализиран за ѓубрива Fertilizer Daily, западните санкции против акционерите и менаџерите на руските производители на ѓубрива доведуваат до значително намалување на снабдувањата од таа земја.
„Санкциите наметнати од властите на ЕУ кон Русија и нанесоа силен удар на нејзиниот енергетски пазар и хемиската индустрија. Нема да биде изненадување доколку во наредните недели продолжи намалувањето на производството на азотни ѓубрива во ЕУ, што ќе доведе до нивно натамошно поскапување и нарушување на есенската сеидба“, коментираат од информативно-аналитичката служба на овој портал.
