Владата на Србија на денешната седница ја измени Регулативата за ограничување на цената на основните прехранбени производи со пропишување нова максимална малопродажна цена на млекото.
Се менува и максималната трговска маржа за сите видови UHT (ултрапастеризирано) млеко и се намалува од 12 на пет проценти.
Со одлуката на Владата на Србија се воведува забрана за извоз на свежо млеко и одредени млечни производи до 30 септември. Забраната нема да важи за Македонија и Албанија.
Земјоделците изминативе денови посочија дека поради зголемените трошоци за производство на сурово млеко, поскапувањето на добиточната храна и сушата, се намалило производството на сурово млеко, но и откупот.
Претходните денови во некои трговски синџири низ Србија беа испразнети полиците со млеко, а оваа одлука на Владата на Србија би требало да спречи недостиг и да го регулира снабдувањето на пазарот.
Претходно, на 30 август, Владата на Србија ја продолжи важноста на Регулативата за ограничување на цената на основните прехранбени производи, а со тоа и цената на млекото до денеска беше ограничена на 119,99 динари.
