Изгледите за приносите на летните посеви дополнително се намалени, покажа августовското издание на билтенот на Европската комисија JRC MARS – Crop Monitoring in Europe. Екстремно топлите и суви временски услови во поголемиот дел од Европа продолжија значително да ги намалуваат прогнозите, кои веќе не беа добри и во јули.
Најпогодени се пченката за зрно (-8,6 отсто на ниво на ЕУ), сончогледот (-5,5 отсто) и сојата (-9,6 отсто). Тековните прогнози за принос за овие култури се под петгодишниот просек, помеѓу 12 проценти (сончоглед) и 16 проценти (пченка за зрно).
Од друга страна, топлите и сушни услови беа погодни за жетвата на зимските посеви, што доведе до благо подобрување на прогнозите за родот.
Најпогодени области
Шпанија, Франција, централна и северна Италија, централна Германија, Унгарија, Романија, Словенија и Хрватска се меѓу најтешко погодените региони во Европа. Во извештајот се наведува дека и пред екстремните горештини и сушата, овие региони биле погодени од продолжен недостиг на дожд.
Периодите на воден и топлински стрес делумно се совпаѓале со чувствителните фази на цветање и оформување на зрната. Оваа комбинација резултирала со неповратно изгубен потенцијал за принос. Неколку земји воведоа мерки за ограничување на употребата на вода за наводнување.
Во некои региони, како што се северозападна Италија и јужна и централна Шпанија, многу ниските нивоа на вода во резервоарите не беа доволни за да се задоволат потребите за вода на земјоделските култури, а некои полиња повеќе не се наводнуваат.
Исто така, во повеќето делови на континентот ваквото време негативно се одрази на пасиштата.
Во земјите од Бенелукс, западна Германија, западна Полска, источна Словачка, Бугарија и јужна Украина, недостатокот на врнежи во комбинација со повремени високи температури, исто така, негативно влијаеше на летните култури и имаше негативен ефект врз изгледите за принос.
Додека недостатокот на врнежи беше погоден за жетвата на зимските култури во повеќето земји, забележителниот вишок во Летонија и Литванија негативно влијаеше на зимските посеви во последните фази на созревање на житарките и предизвика одредено доцнење на почетокот на жетвата.
Суша и на есен
Извештајот дава и временска прогноза до 27 август. Така, влажни услови со акумулирани врнежи меѓу 40 и 120 мм се прогнозираат во Британија, голем дел од Скандинавија, мал дел од европска Русија, поголемиот дел од Полска, Словачка, Унгарија, источна Хрватска, западна Романија и делови од Западен Балкан, како и јужна Германија, Алпите и северниот дел на Италија. Се предвидува дека овие региони ќе имаат меѓу 3 и 8 дена со врнежи над 5 мм, додека само до 2 такви денови се предвидени за остатокот од Европа.
Според долгорочната временска прогноза за септември, октомври и ноември, во поголемиот дел од Европа во септември најверојатно ќе останат потоплите услови и веројатно ќе продолжат и во октомври. Посуви од нормалните услови се предвидуваат за Пиринејскиот полуостров, делови од западна Европа и мали области од централна Европа и на Балканот.
