Ретко кој се одлучува за одгледување афион, иако неговата цена за килограм не може да се каже дека е ниска. Земјоделецот Саво Квргиќ од Турија, Бачка, Србија, решил да одгледува афион.
Овој земјоделец минатата есен посеал афион и пред пет дена го ожнеал. Како што вели, афионот се сее како пченица кога дозволуваат временските прилики, а есента и пролетта имало многу врнежи, па афионот убаво никнал и имал густа структура. Важно е, нагласува Саво, афионот да биде сув пред вршидбата, за да не мора дополнително да се суши.
„Го посеав афионот од љубопитност бидејќи никогаш претходно немав сеено, сакав да видам како ќе помине. Тој е многу чувствителен, ако го посеете, а потоа веднаш не заврне, ништо нема да биде од него, па во тој случај треба земјиштето да го преорате и да посеете нешто друго“, вели Квргиќ, кој благодарение на врнежите го избегнал тоа сценарио.
Исто така, неговата нива не била нападната од никаква болест или штетник, бидејќи во Турија, како што вели, никој не сее афион, па немале парцела од каде што би се преселиле на неговиот насад.
Цената на големо се движи од 200 до 250 динари за килограм афион, на мало до 500 динари.
Бидејќи штотуку е завршено вршењето на афион од неговата парцела, тој сè уште не може точно да го процени приносот бидејќи, според него, сè уште е прилично валкан и мора да го селектираат два-три пати преку селектор за да има идеална чистота. Комбајнот не може да го направи тоа оптимално бидејќи станува збор за лесно, ситно растение.
„Сè уште не сум нашол на кого ќе му го продадам, чекам да биде комплетно селектиран и спремен, па дефинитивно ќе го продадам на големо, на мало не вреди бидејќи немам кому да продадам толку афион“, рече овој земјоделец и додаде дека цената за килограм започнува од 200 и оди до 250 динари доколку се продава на големо, додека кога се продава на мало, од дома, по два или три килограми, цената е околу 500 динари.
Саво Квргиќ инаку се занимава со земјоделско производство и во размер половина-половина сее соја и пченка. Преку ИПАРД овој земјоделец купил трактор од 120 коњски сили. Покрај земјоделството, има и три коњи, црни липицанери кои се исклучително ретки.
„Со одгледување коњи се занимавам од својата седумнаесетта година и исклучиво чувам липицанери. Порано чував бели, а сега вранци. Тие се мојата голема љубов. Немам никаква корист од нив, а трошоците не се мали. Но љубовта кон тоа благородно животно е бесценета и никогаш не би се откажал од нив“, вели Саво.
Извор: Agromedia
