Бачовски: Потпишани решенијата за исплата за 17.280 тутунопроизводители кои произвеле и предале тутун од реколта 2021

Директорот на Платежната агенција, Никица Бачовски, објави дека се потпишани решенијата за исплата на тутунопроизводителите.

„Ги потпишав решенијата за исплата за 17.280 тутунопроизводители кои произвеле и предале тутун од реколта 2021.
Веднаш по донесувањето на потребните законски измени, службите при АФПЗРР во најбрз рок ги изготвија решенијата за кои веќе се генерираат и налозите за исплата со што во текот на наредната недела на сметките на тутунарите ќе легнат близу 1.3 милијарди денари.
Благодарност до пратениците од македонското Собрание и министерот Љупчо Николовски, кои овозможија непречена исплата на финансиската поддршка за тутунарите.
Во периодот што следи ќе се реализираат и исплати на субвенции за млеко, за кокошки несилки и бројлери, како и исплатите од Интервентниот фонд кои предвидуваат поддршка за заклано јагне и предадени гоеници и субвенционирање на вештачки ѓубрива.“, напиша Бачовски.