Министерот Љупчо Николовски, по повод Светскиот ден на млекото, присуствуваше на настан во најголемата реномирана компанија во индустријата на млекото, БИМИЛК.
„Оваа година за прв пат воведовме дополнителна субвенција за квалитет на млеко.
Воведовме и интервентна субвенција во износ од 5,5 денари за кравјо млеко произведено и предадено во преработувачки капацитети. Во април исплативме 112 милиони денари субвенции на 5.664 млекопроизводители. Наскоро со ребалансот на Буџетот ќе бидат исплатени и субвенциите за 2021 година.
Дополнително, 2022 година е година на историски највисока набавка на високопедигрирани грла добиток со висок генетски потенцијал. Ова е голем успех за сите нас, сточниот фонд ќе се обнови со високомлечни раси.
Со тоа ќе имаме зголемено производство на млеко. А токму тоа е целта! Да ги надминеме сите предизвици, да даваме силна поддршка на земјоделците, сточарите и да носиме мерки во интерес на сите, на целокупната млечна индустрија.“, рече министерот Николовски.
