Пазарно истражување – дегустација на јагнешко месо од автохтоната раса овци „Праменка Овчеполка“

Здружението на одгледувачи на домашната автохтона раса овци „Праменка овчеполка“ во соработка со земјоделскaта задруга „Еко Овчеполка“ денеска во Градскиот трговски центар во Скопје организира дегустација на јагнешко месо од автохтоната раса овци „Праменка Овчеполка“.

Целта на дегустацијата е пазарно истражување кое треба да ја покаже оценката на потрошувачите за вкусот и квалитетот на месото. Како што велат од Здружението „Праменка овчеполка“, придобивките ќе бидат зачувување на агроеколошките карактеристики, одржување на природната средина, органско производство, традиционално одгледување и заштитени ознаки на јагнешкото месо, традиционалното овчо сирење и традиционалниот овчи кашкавал, зголемен приход на одгледувачите на „Праменка Овчеполка“ преку однапред определени целни пазари, зголемен интерес за одгледување на расата, стандардизиран и безбеден производ, подобрување на имиџот на традиционалното производство на јагнешко месо и промоција на македонски бренд „македонско јагнешко од ‘Праменка Овчеполка’“ како предуслов за развој на руралниот туризам и на македонските села.

По повод дегустацијата и реализацијата на истражувањето, најавени се обраќања на државниот советник во Министерството за земјоделство Трајан Димковски, на претседателот на Здружението „Праменка овчеполка“ Моме Младеновски, на Никола Георгиев од Сојузот на одгледувачи на овци „Модерен овчар“, на Сузана Димитриевска од Македонската асоцијација на земјоделски задруги, на Драган Перич од CARE – Германија и на Златко Самарџиев од Глобалниот еколошки фонд .