Министерот за земјоделство, шумарство водостопанство Љупчо Николовски заедно со заменик-шефот на Делегацијата на Европската Унија, Џулијан Васало и градоначалникот на општина Крива Паланка, Сашко Митовски, денеска беа на локацијата во селото Конопива, Крива Паланка, каде што започна изградбата на системот за наводнување на Селска река.
„Во село Конопица, Паланечко, на Селска Река започнуваме со изградба на нов затворен систем за наводнување во должина од 5,4 километри. Носиме вода до 42 хектари обработливо земјоделско земјиште, директно помагајќи на повеќе од 100 земјоделци кои ќе го користат овој нов ситем за наводнување“, рече Николовски.
Овој систем е финансиран од Европската унија преку Инструментот за претпристапна помош (ИПА) 2019 односно во рамки на проектот „Изградба на мали системи за наводнување во општините во Република Северна Македонија – Фаза 2“.
„Изразувам голема благодарност до Делегацијата на ЕУ за реализацијата и успешноста на овој проект, кој е од големо значење за земјоделците и за зголемување на ефикасноста на земјоделското производство. Со финансиска поддршка од ЕУ преку ИПА фондовите продолжуваме со изградба на мали системи за наводнување во општините ширум државава“, рече министерот.
