Владата денеска ја усвои Програмата за интервентен фонд Ова е прв пат да се носи ваков интервентен фонд, со којшто преку интервентни мерки им помагаме на земјоделците во оваа тешка состојба на економска криза со која се соочува целиот свет, да имаат помали трошоци а со тоа и одржливо производство.Со интервентниот фонд засега се предвидени 250 милиони денари за интервевтни мерки во растителното и сточарското производство, пари со кои ќе се придонесе за намалување на зголемените трошоци во овие гранки – изјави на прес конференција министерот за земјоделство, Љупчо Николовски.
За интервентни мерки во растителното производството се предвидени 120 милиони денари за субвенционирање на трошоците за ѓубрива. Според анализите поради регистрираниот пораст на цените на вештачките ѓубрива земјоделците ќе добијат поддршка од 2.500 денари по хектар за направен трошок за набавени вештачки ѓубриња и тоа во количина најмалку од 200 килограми по хектар.
-Оваа мерка е наменета за производителите на пченица и јачмен. Корисници на оваа подмерка се земјоделците кои во производната 2021/2022 година имаат засеани површини со пченица и јачмен. Услов за користење на оваа финансиска поддршка е при поднесување на барањата за субвенцијата физичките лица да приложат фискална сметка со пропратен документ за идентификација за припадноста на фискалната сметка (сметкопотврда или испратница) каде е назначен видот на вештачкото ѓубре и количината изразена во килограми, а правните лица ќе треба да приложат фактура со испратница каде е назначен видот на вештачкото ѓубре и количината изразена во килограми вклучително и доказ за извршено плаќање по фактура односно уплатница или извод од банка – рече Николовски.
Во интервентниот фонд се предвидени и дополнителни средства за одгледувачите на јагниња и на свињи. Односно сточарите ќе добијат дополнителни 400 денари за предадено јагне во регистрирани кланици и 1.500 денари за предадени гоеници во регистрирани кланици.
За овие интервентни мерки, земјоделците ќе можат да аплицираат од 1-ви мај годинава, што значи во овој помалку од месец и пол период ќе можат да ја комплетираат потребната документација. Исплатата за мерките ќе биде најдоцна до 30-ти јуни оваа година.
-Во овој тежок период, Владата и министерството ги насочи сите ресурси и енергија кон справување со кризата, економска поддршка за граѓаните, за земјоделците, за бизнис секторот. Затоа и се донесе интервентниот фодн со кој придонесуваме за намалување на производствените трошоци што ги имаат земјодецлите поради покачени цени на репроматеријали, намалени откупни цени, а се со цел да можат да имаат одржливо производство, но и да ги заштитиме граѓаните од ценовни шокови на финалните производи на пазарот. И во следниот период будно ќе ги следиме состојбите на пазарот и заеднички со сите чинители навреме ќе реагираме и ќе носиме соодветени мерки, за стабилно земјоделско производство, за стабилност на пазарот на храна – изјави Николовски.
