Министерот за земјоделство на Србија, Бранислав Недимовиќ вели дека 400.000 тони вештачки ѓубрива се потребите на Србија и дека целосно се обезбедени преку увозниците.
„Обезбедивме 400.000 тони вештачки ѓубрива, а земјоделските производители на пченица, а подоцна и на другите култури целосно ќе бидат подмирени“, рече Недимовиќ во гостувањето на РТС.
Рече дека факт е дека во светот има сериозна криза со гасот и дека Србија не може да се однесува како да е сама на планетата.
„Србија и Југославија отсекогаш биле зависни од увоз на уреа бидејќи немавме доволно гас. Како што немаме море, така немаме гас. Секогаш мора да бидеме свесни за моментот во кој живееме. Цената на уреата почна да паѓа, сега за речиси 200 евра е помала од пред еден месец и тоа е трендот“, објаснува Недимовиќ.
Тој нагласи дека на пазарот има доволно ѓубриво, дека пристигнуваат нови контингенти и дека тоа ќе биде сосема доволно за сите работи во земјоделството.
Претходно, Министерството за земјоделство на Србија најави вонредна контрола на увезеното ѓубриво и неговиот квалитет, за во оваа ситуација да нема никаква злоупотреба и штета на земјоделците.
Исто така рече дека е обезбедено семе за сеидба и дека нема причина за загриженост.
„Што се однесува до пченката и другите култури кои одат на пролет, не грижете се, ние имаме сопствено производство и немаме никакви проблеми“, нагласува Недимовиќ.
