Во текот на изминатата година, цените на храната во светот пораснале за повеќе од 28 отсто, се наведува во најновиот извештај на Организацијата на ОН за храна и земјоделство (ФАО). Мала утеха е што цените благо паднаа во декември 2021 година бидејќи меѓународните котации на растителните масла и шеќери значително се повлекоа од високите нивоа.
Индексот на цените на храната, пресметан од ФАО, во декември во просек изнесуваше 133,7 поени, што е за 0,9 отсто помалку во однос на ноември. Но, во однос на декември 2020 година, тој е поголем за 23,1 отсто.
Индексот ги следи месечните промени во меѓународно цени на прехранбени производи. Само млечните производи поскапеа на месечно ниво во декември.
Според извештајот, објавен на официјалната веб-страница на агенцијата на ОН со седиште во Рим, индексот на цените на храната за цела 2021 година во просек изнесувал 125,7 поени. Тоа е за 28,1 отсто повеќе од претходната година.
„Иако високите цени на храната обично даваат поттик за зголемување на производството, глобалната пандемија и сè понеизвесните климатски услови оставаат малку простор за оптимизам“, вели Абдолреза Абасијан, економист во ФАО.
Што се однесува до движењето на цените во декември, житарките поевтинија за 0,6 отсто во однос на ноември. Поевтините цени на пченицата го надомести растот на цените на пченката, предизвикан од силната побарувачка и загриженоста поради продолжената суша во Бразил.
Меѓутоа, цените на житарките лани пораснаа во просек за 27,2 отсто, достигнувајќи го највисокото ниво од 2012 година. Пченката скокна за 44,1 отсто, пченицата за 31,3 отсто, а оризот за 4,0 отсто.
Одредени цени на храната паднаа во текот на декември 2021 година
Цените на растителните масла паднаа за 3,3 отсто во последниот месец, бидејќи потонаа котациите на палминото и сончогледовото масло поради намалената глобална побарувачка за увоз, под влијание на загриженоста за зголемениот број случаи на ковид-19. Сепак, цените на растителните масла во текот на 2021 година достигнаа највисоко ниво во историјата, пораснаа за 65,8 отсто во однос на 2020 година.
Во декември на месечно ниво паднаа и цените на шеќерот за 3,1 отсто, на најниско ниво во последните пет месеци. ФАО, исто така и ова го припишува на загриженоста за влијанието на сојот омикрон врз глобалната побарувачка, слабеењето на бразилската валута и пониските цени на етанолот. На годишно ниво, пак, цените на шеќерот се зголемија за 29,8 отсто минатата година, на највисоко ниво од 2016 година.
Котациите на месо во декември останаа главно стабилни, но во текот на 2021 година се зголемени за 12,7 отсто во однос на претходната година.
На светскиот пазар само млекото и млечните производи во декември поскапеле за 1,8 отсто во однос на ноември. Тоа е затоа што пониското производство на млеко во Западна Европа и Океанија ги зголеми цените на путерот и млекото во прав, додека цените на сирењето незначително се намалија. Цените на млекото минатата година беа во просек за 16,9 отсто повисоки од 2020 година.
