Здруженето на пчелари од Охрид јавно застана во одбрана на својот член Лазе Грозданов кој правосилно е осуден на парична казна од 15.000 евра зашто неговите пчели нападнале три лица во 2014 година. Според пресудата на Основниот суд од Охрид изречена после 8 години, лицето претрпело страв, а и имал физички и душевни болки.
Инцидентот се случил на 30 јуни 2014 година кога Грозданов во Охрид со моторно возило превезувал сандаци со пчели. Пчелите при транспортот излегле од сандаците и ги нападнале В.П., неговата сопруга и петмесечното бебе додека шетале на булеварот „Туристичка”.
Грозданов за овој случај е прогласен за виновен од Судот во Охрид.
Според Тони Јосифоски, претседател на пчеларското здружение кое брои околу 50 членови, ваквата пресуда е апсурдна и е донесена во време кога целиот свет носи заштитни мерки за пчеларството, поддржувајќи го секторот со огромни финансиски средства.
Нивниот денешен собир, како што изјави, е токму во оваа насока – јавно да го дигнат гласот, таквите случаи да не станат судска пракса.
– Ова е прв проблем што удира по пчеларите и бараме од Министерството за правда и Републичкиот совет да ја преиспитаат оваа одлука на Судот во Охрид и да застанат во заштита на пчелите, рече Јосифоски на денешната средба на членовите на Пчеларското здружение од Охрид одржана во Големата сала на Општина Охрид.
МИА
