Месечните извештаи на Државниот автоматски мониторинг систем за квалитет на амбиентен воздух за Тетово покажуват дека во 2021 година имало 132 денови со загаден воздух односно надминување на дозволената гранична вредност од 50 ПМ10 на метар кубен. Во една календарска година според светските здравствени стандарди не треба да има повеќе од 35 денови со загаден воздух.
Најмногу или 28 дена имало во декември, 22 во ноември 22, 21 во февруари, 18 во јануари итн. Само септември е месец со ниту еден ден загаден воздух.
-Најзагадено е во месеци кога има најголемо влијание поради греењето со дрва. Многу е во пет месеци да има загаден воздух. Нотирани се причините и последиците, се покажува дека не може да се превенира, туку треба радикално решавање, сегашните мерки се недоволни. Постојано повторуваме дека гасификацијата е тоа радикално решение за Тетово. Немаме ни совест, сиромаштијата си го прави своето, се ложи со отпад и во индустријата. Акцијата со замена на печки на дрва со инвертери е племенита, се намали аерозагадувањето, но тоа се покажува недоволно – изјави д-р Ратко Давидовски, специјалист по хигиена и здравствена екологија при Центарот за јавно здравје Тетово.
Докторот потсетува дека долготрајното соочување со загаден воздух носи тешки последици по здравјето.
– Оваа студија се појави во журнал за хепатологија. Тоа е нова кинеска студија која покажува дека загадениот воздух влијае да се појави замастување на црниот дроб. Замастувањето значи дека клетките ја намалуваат својата функција, а црниот дроб е една хемиска лабораторија за организамот која го пречистува телото и има други метаболни функции, објаснува тетовскиот доктор.
Поради изведување на градежни работи во близина на мерната станица на Државниот автоматски мониторинг систем во Тетово, Давидовски препорачува таа да биде преместена на друга соодветна локација.
Во 2020 година од 366 денови 138 биле со загаден воздух во Тетово. Тетовци најмногу се соочуваа со загадениот воздух во 2015 година со оглед дека од 365 денови дури во 350 имало високо присуство на штетните ПМ 10 честички.
