Деновиве во просториите на Факултетот за земјоделски науки и храна, се одржува манифестацијата „Денови на кариера“, под мотото „Запознај го својот иден вработен/работодавец!“. Проектот е поддржан од Програмата за зголемување на пазарната вработливост – ИМЕ, финансирана од Швајцарската агенција за развој и соработка, а директорот на програмата ИМЕ, Горан Дамовски, имаше свое обраќање на панел-дискусијата.
„Земјоделското производство како никогаш досега се темели на наука, на истражување, на научни истражувања, за да се постигнат целите за глобален одржлив развој. Морам да истакнам дека Програмата за зголемување на пазарна вработливост има одлична соработка со Факултетот за земјоделски науки и храна. Нашата поддршка и директна инволвираност во „Деновите на кариера“ е всушност во зголемување на можностите студентите да дојдат до компаниите со цел нивно полесно вработување по завршување на студиите.
Студентите имаат можност директно да се запознаат што е она што на компаниите им треба, каков тип вештини треба да поседуваат, кои технологии треба да ги разбираат, да ги знаат за нивното вработување да стане полесно, да стане реално.
Од друга страна и компаниите имаат можност да ја изразат својата спремност да примат практиканти на обука, да ја доближат својата работа до практиките што се изучуваат на Факултетот, да изразат спремност за обезбедување услови за изработка на дипломски, магистерски, докторски трудови под менторство на професорите на факултетот и на тој начин да добиеме едно целпосно приближување на науката и бизнисот.
Верувам дека ова е единствениот начин за постигнување услови за креирање на одржливи работни места коишто се пристојни работни места за висококвалификуваниот кадар во земјава.“, изјави директорот на Програмата за зголемување на пазарната вработливост – ИМЕ.
