Во рамките на Деновите на кариера, под мотото „Запознај го својот иден вработен/работодавец!“, се одржа настанот „Денови на кариера“, поддржан од Програмата за зголемување на пазарната вработливост (ИМЕ), финансирана од Швајцарската агенција за развој и соработка.
Настанот беше можност за директни средби на релација „Студент-Работодавец“ каде што во аулата на Факултетот за земјоделски науки и храна, манифестацијата имаше за цел да ги поврзе и главните чинители од бизнис-секторот и институциите со Факултетот за земјоделски науки и храна-Скопје, со цел согледување на потребите на пазарот на трудот и можностите за прилагодување на студиските програми, практиканството и можностите за вработување.
Очекувано, интересот за настанот беше голем, со оглед на тоа што свое обраќање имаа клучните актери за иницирање, поддршка и спроведување на политиките за современо образование и кариерен развој, како и развојот на земјоделско-прехранбениот сектор, меѓу кои Проректор за меѓународна соработка при Универзитет „Св. Кирил и Методиј“ во Скопје, Проф. д-р Ордан Чукалиев, Декан на Факултетот за земјоделски науки и храна, Проф. д-р Вјекослав Танасковиќ, Директор на програмата ИМЕ, г-дин Горан Дамовски, г-дин Гоце Георгиевски, претставник од МЗШВ, проф. д-р Драги Димитриевски, Факултет за земјоделски науки и храна.
„Секојдневно добиваме информации од стопанството дека има потреба од кадар во земјоделството. Вообичаено гледаме дека наши студенти се снаоѓаат и во други држави така што таа потреба се зголемува и тоа беше една од иницијалните причини зошто да го организираме овој настан. Исто така, целта на настанот беше обука за студентите во делот подготовка за вработување, пишување на мотивациско писмо, подготовка на CV, потоа студентите учествуваа на традиционални студентски смотри, презентираа научно истражувачки трудови. Тоа е една од активностите на нашиот факултет, да ги активираме студентите и во наука да работат. Сите чинители во стопанството да придонесат, бидејќи сме во процес на акредитација на нови студентски програми, да се фокусираме на она што е цел на пазарот на трудот, да ни помогнат заеднички да го доловиме она што е најзначајно во моментот и тоа да го преточиме во нашите студиски програми“, рече проф. д-р Вјекослав Танасковиќ, декан на Факултетот за земјоделски науки и храна.
„Активностите кои ги поддржуваме во рамки на настанот „Денови на кариера“ при Факултетот за земјоделски науки и храна се со цел поврзување на студентите со компаниите и зголемување на можностите за нивно вработување во земјоделскиот сектор по завршувањето на студиите. Истовремено студентите ќе стекнат увид за реалните потреби на компаниите, а компаниите ќе ја дефинираат нивната спремност да примат практиканти на обука, но и да обезбедат услови за изработка на дипломски, магистерски и докторски трудови. Верувам дека на овој начин поддржуваме една од главните цели на Програмата ИМЕ, финансирана од Швајцарската агенција за развој и соработка, а тоа е создавање на одржливи работни места за високо квалификуваниот кадар во Северна Македонија“ – посочи Горан Дамовски, директор на Програмата за зголемување на пазарната вработливост –ИМЕ.
„На покана на мојот матичен Факултет за земјоделски науки и храна и на мое огромно задоволство денеска имав чест да се обратам на настанот „Денови на кариера“, поддржан од Програмата за зголемување на пазарната вработливост (ИМЕ), финансирана од Швајцарската агенција за развој и соработка.
Ја искористив приликата да ги презентирам можностите кои ги нуди Програмата за финансиска поддршка на руралниот развој и плановите за иден развој на младите земјоделски професионалци.
Искажувам јавна благодарност до моите професори што на овој начин ги афирмираат своите студенти да ги градат своите кариери во еден комплексен сектор како што е земјоделството.“, рече г-дин Гоце Георгиевски, претставник од МЗШВ.
