По повод 74 години од постоењето на Факултетот за земјоделски науки и храна во Скопје, се одржува настанот Денови на кариера под мотото „Запознај го својот иден вработен/работодавец!“. Како што изјави деканот на Факултетот за земјоделски науки и храна, проф. д-р Вјекослав Танасковиќ, настанот има за цел онаа алка којашто е основна обврска на факултетот, а тоа е студентот, да го поврзе со факултетот и со стопанството.
„Ние долги години имаме факултет Стопанство, соработката со бизнис-секторот, стопанството, јавните институции. Целта ни е сега потребите на пазарот на трудот коишто се јавуваат, а кои ги слушаме од производителите, од секторот, од институциите. Сакаме на лице место овде, значи работодавач и потенцијални вработени да ги ставиме на една заедничка маса и со тоа да го интензивираме процесот на вработување на овој кадар кој е неопходен во секторот, а потребите се јавуваат, се многу големи. Секојдневно добиваме информации од стопанството дека има потреба од овој кадар. Вообичаено гледаме дека наши студенти се снаоѓаат и во други држави така што таа потреба се зголемува и тоа беше една од иницијалните причини зошто да го организираме овој настан. Исто така, целта на настанот беше обука за студентите во делот подготовка за вработување, пишување на мотивациско писмо, подготовка на CV, потоа студентите учествуваа на традиционални студентски смотри, презентираа научно истражувачки трудови. Тоа е една од активностите на нашиот факултет, да ги активираме студентите и во наука да работат. Сите чинители во стопанството да придонесат, бидејќи сме во процес на акредитација на нови студентски програми, да се фокусираме на она што е цел на пазарот на трудот, да ни помогнат заеднички да го доловиме она што е најзначајно во моментот и тоа да го преточиме во нашите студиски програми“, рече Танасковиќ.
