Во општините Гевгелија, Богданци и Валандово при крај се работилниците за мали производители на домашни производи, на кои тие се запознаваат со придобивките од концептот „кратки синџири за снабдување со храна“ како директно да ги пласираат своите производи до крајните купувачи.
– Малите производители на храна од Југоисточниот регион имаат проблеми при пласманот на своите производи поради што целта на овој проект е да се воспостави и тестира нов систем на директна продажба од производителот до купувачот врз база на меѓусебна доверба и без посредници кои ја зголемуваа цената на производите и заработуваа повеќе од производителите, изјави Ристо Атанасовски од Фондацијата за локален развој во Гевгелија, која ги организира обуките.
Земјоделските производители кои присуствуваат на обуките ќе имаат можност да бидат дел од сите проектни активности кои ќе им овозможат во иднина преку концептот „кратки синџири за снабдување со храна“, без посредници да ги продаваат своите производи.
МИА
