Љубителите на кафето во иднина можеби ќе пијат кафе произведено во лабораторија, а не на плантажа, велат финските научници кои се надеваат дека успеале да одгледаат одржливо кафе.
„Тоа е навистина вистинско кафе затоа што во овој производ нема ништо освен – кафе“, вели Хеико Ришер, покажувајќи кон сад полн со кафеав прав.
Тој и неговите колеги од финскиот Институт за технички истражувања VTT веруваат дека со производството на овој вид кафе ќе се избегнат многу еколошки проблеми предизвикани од масовното производство на еден од најпопуларните пијалаци во светот.
Нивното кафе не е сомелено од зрна, туку се одгледува од група растителни клетки на кафе под строго контролирани услови во биореактор.
„Кафето е проблематичен производ“, рече Ришер, делумно затоа што поради зголемувањето на глобалните температури постоечките насади се помалку плодоносни.
„Тука е и проблемот со транспортот, како и користењето на фосилните горива. Совршено е логично да се бара алтернатива“, смета Ришер.
Ришер верува дека ќе бидат потребни најмалку четири години пред кафето од лабораторијата да добие одобрение од регулаторот за комерцијална употреба.
Проектот би можел да биде важен и за Финска, која е меѓу водечките земји во светот во однос на потрошувачката на кафе по глава на жител.
Засега само специјално обучени дегустатори имаат дозвола да го пробаат.
„Засега им е дозволено само да го вкусат и плукаат, не смеат да го проголтаат“, рече научникот Хеики Аисала, експерт за сензорна перцепција кој води група дегустатори како дел од финскиот проект.
