На аеродромот во Виена се гради најголемата соларна електрана во Австрија. Осум соларни централи ќе произведуваат речиси една третина од годишната потрошувачка на енергија на аеродромот, што е еднакво на потрошувачката на 7.000 домаќинства.
Австрија сака до 2030 година со обновлива енергија да покрие 100 отсто од потребите за електрична енергија.
Иако авијацијата со 2,7 отсто, предизвикува само мал дел од глобалните емисии на јаглерод диоксид, аеродромот во Виена го презема својот дел од одговорноста и постојано го намалува овој број преку соларните инсталации и новите еколошки технологии.
„Виенскиот аеродром испрати јасен сигнал за иднината!“, рече државниот секретар на Министерството за клима и енергија – Магнус Брунер.
Новата електрана со своите 55.000 соларни панели ќе испорачува 30 милиони киловат-часови електрична енергија годишно, со максимална моќност од 24 мегавати на површина од 24 хектари.
„Заштитата на климата има најголем приоритет, а целта е јасна – климатска неутралност до 2040 година. За таа цел, ние вложуваме во соларни централи, ветерници и хидроцентрали, далечинско греење и други технологии. Со производство на електрична енергија преку соларните панели до 2025 година ќе дојдеме до максимални 250 мегавати, а до 2030 година на 800 мегавати“, објаснува градскиот министер за финансии, Петер Ханке.
