Како дел од стратегијата „Од поле до маса“, Европската комисија минатата недела започна поширока јавна консултација за ревизија на Законот за заштита на животните. Амбицијата е да се претстави законодавен предлог до земјите членки и Европскиот парламент во рок од две години.
Законот првенствено се однесува на транспортот на живи животни во трети земји, бидејќи се верува дека многу од нив страдаат од глад, жед и многу лоши услови за време на транспортот, поради што се разболуваат или угинуваат. Последниот најголем таков случај е забележан пролетта. Тогаш, повеќе од 2.000 говеда мораа да бидат усмртени откако повеќе од три месеци пловеле по морето.
Новиот предлог има за цел да се утврди во кое време може да се транспортираат животните, под кои услови, а ќе биде потребно присуство на ветеринар кој ќе се грижи за нив за време на патувањето, како и инсталирање на безбедносни камери за следење на нивното однесување.
Втората точка е чувањето добиток на фармите, што најчесто се однесува на одгледувањето во кафези, но и во боксови. Покрај тоа, се разговара за квалитетна исхрана, добра животна средина, здравје и општа грижа за животните. Овој дел од предлогот исто така се однесува на барањето за означување на производите што ќе им обезбедат на потрошувачите од ЕУ информации за тоа дали увезените производи се добиени од животни кои не се одгледуваат во согласност со правилата што мора да ги следат сточарите од ЕУ.
Се разгледува и однесувањето кон животните во времето на колењето, како што е зашеметување на живината со потопување на главата во електрифицирана бања, но и зашеметување на свињите со помош на СО2, а примената на електричен стап да се ограничи.
По повод дискусијата, Стела Киријакидес, советничка за здравје и безбедност на храната, изјави дека граѓаните на ЕУ се грижат за животните и сакаат Европската комисија да направи повеќе за нив, и затоа нивното мислење е важно за нив во време кога тие ги развиваат идните европски правила за нивната благосостојба.
„Исто така, ќе посветиме посебно внимание на она што земјоделците, засегнатите страни од прехранбениот сектор, невладините организации и јавните институции имаат да кажат на оваа тема“, рече таа.
Јавната консултација ќе трае до 21 јануари 2022 година, а во нејзиниот прв дел, досега се објавени речиси 1.000 коментари. До јавната консултација можете да пристапите на овој линк, а можете и да оставите ваш коментар.
