Дваесет свињи од одгледувачот Хосе Хархуис, како дел од шестнеделниот експеримент, пуштени се слободно да се движат на полињата кои се наоѓаат помеѓу двете писти на Меѓународниот аеродром во Амстердам.
Ова е прв експеримент од овој тип, со цел да се намали опасноста што птиците ја претставуваат за авионите на пистите.
Аеродромот се протега на 26,7 квадратни километри, а поради мочурливото подрачје на кое е изграден е прибежиште и дом на многу гуски и други птици.
Аеродромот веќе вработил 20 луѓе – таканаречени „контролори на птици“, кои се грижат воздушниот простор пред патничките авиони да биде чист.
Но, во ова време од годината, недалеку од аеродромот, голем број птици се собираат и се хранат со остатоците од земјоделски култури и шеќерна репка оставена на полињата. Тука настапува „свинската патрола“.
„Свињите беа пуштени на полето во вторникот, 12 часа по бербата на шеќерната репка. Тие ќе ги изедат остатоците од посевите и репката, така што нема да остане ништо за гуските“, изјавил Хархуис.
