Поради мразот и болестите што ги опустошија лозјата, Франција оваа година ќе произведе најмалку вино откако започнале да објавуваат податоци, соопшти француското Министерството за земјоделство.
Во споредба со просекот во изминатите пет години, производството ќе биде пониско за една четвртина, односно 29 проценти помало отколку во 2020 година и ќе достигне 33,3 милиони хектолитри.
„Пролетните мразови намалија добар дел од производството и ќе бидат најниски во историјата, послаби отколку во 1991 и 2017 година“, се вели во соопштението на министерството.
Производството исто така страдало од силните пролетни мразови во тие две години, забележува Ројтерс. Од Министерството посочуваат и дека годинешните загуби ќе се продлабочат со појавата на болести на виновата лоза.
Во август, министерството проценило дека производството на вино годинава ќе падне од 24 до 30 проценти, на 32,6 до 35,6 милиони хектолитри.
Од министерството велат дека скоро сите домашни винарски региони се погодени од неповолните временски услови, но со различен интензитет.
Производството во регионот Шампањ се претпоставува дека ќе се намали за 36 проценти поради обилните летни врнежи, што го поттикна развојот на мувла и зголемените загуби поврзани со мразот. Мувлата предизвикува сушење на гроздовите и лисјата, пренесува Ројтерс.
Производителите предупредија во јули дека може да се загуби дури половина од бербата, иако резервите на пазарот нема да бидат загрозени, благодарение на залихите од претходните години.
Според информациите од Министерството, регионот Бургунди-Божоле исто така е тешко погоден и неговото производство треба да се преполови во споредба со 2020 година, поради мраз, град и болести, кои уништиле добар дел од родот на Бургундија.
Во регионот Бордо, производството треба да опадне за една четвртина. Областа Совињон била тешко погодена од мраз, така што производството на бело вино ќе се намали, додека сортата грозје мерло, која особено се користи во производството на заштитените вина од Сен-Емилион и Померол, претрпело последици од болести.
Најголемиот производствен регион, Лангедок-Русилон, ќе забележи пад од 32 проценти во однос на минатата година, со дополнителни штети предизвикани од сушата, соопштило министерството.
Одгледувачите на киви, кајсии, јаболка и други овошја исто така се тешко погодени, заедно со земјоделците на други култури, особено на репката, пренесува Франс 24.
