Бенџаминот е најпознат вид од родот на фикуси. Познат и под името расплакана смоква е омилено собно растение кое води потекло од тропските предели на Азија – Индија и Малезија. Има добра толеранција кон ограничени услови на осветлување во затворен простор.
Расте како големо зимзелено дрво во тропска и суптропска клима, но почесто се одгледува како домашно растение во домови и канцеларии заради убавите и елегантни лисја.
Бенџаминот е една од најдобрите билки за подобрување на квалитетот на воздухот во затворените простории. Има една од највисоките стапки на отстранување на токсините од воздухот.
Треба редовно да се наводнува за време на вегетацијата, но и да се остави да се исуши од есен до крајот на зимата. По последниот пролетен мраз, можете да го однесете во градината или на терасата каде што може да го помине летото, а потоа да го вратите кога времето повторно ќе залади. Идеална температура за одгледување е 14-18ºС.
Светлина
Најдобро е да го ставите вашиот Бенџамин на индиректна сончева светлина. Ова растение не сака да биде преместувано. Важно е да се најде добро, светло место и да се остави таму. Никако не смее да биде на провев.
Земја
Бенџаминот не бара почва со особено висока содржина на хранливи материи или органски материи. Во текот на пролетта и летото прихранувајте го еднаш месечно со течно ѓубриво за собни листести растенија. Повремено оросувајте му ги листовите.
Наводнување
Треба да се внимава на правилно залевање. Во зима залевајте го секои десетина дена, а во лето двапати неделно. Никако не дозволувајте да стои во вода. Петнаесет минути по залевањето, истурете го вишокот вода од подлошката. Чувајте го растението постојано влажно, но не дозволувајте да биде премногу во вода бидејќи лисјата ќе му паднат, а корените може да изгнијат.
Пресадување
Пресадувајте го секоја година. Подоцна, кога веќе е во голема саксија, нежно отстранете го горниот слој земја и заменете го со нов.
