Последниот откуп на тутун со пониска цена од претходната година, поради послабиот квалитет и со вишок од 4.000 тони без договор, можеме да го окарактеризираме како проблематичен, каде што државата направи сѐ за да се извлече максимум од ситуацијата.
Директорот на Државниот инспекторат за земјоделство, Зоран Шапуриќ изјави за Агротим дека за оваа година откупувачите, компаниите, склучија договори на многу помала количина, некаде околу 22.000 тони максимум и најавија дека нема да имаат можности поради отежнат пласман на светскиот пазар да откупуваат повеќе.
-Она што го најавуваат експертите дека 22.000 тони тутун помала количина, секако ако останат поволните временски услови ќе доведе и до подобар квалитет, па и цената ќе биде повисока. Нашата работа лани беше надзор на откупот и извршивме околу 5.000 надзори во текот на откупот. Се јави проблем и со еден откупувач од 9 регистрирани, кажа дека нема средства и останаа 500 тони тутун кои потоа ги презема Тутунски комбинат Прилеп – изјави Шапуриќ.
