Соларните панели стануваат сѐ поголем тренд во земјоделското производство, особено кога станува збор за сточарство. Оградите што спречуваат добитокот да побегне, а произведуваат и електрична енергија веќе го најдоа своето место на фармите во Западна Европа.
Овие огради произведуваат електрична енергија и со тоа заштедуваат ресурси. Всушност тоа е комбинација од конструкција на ограда и соларни панели кои мора да се монтираат вертикално или под агол, и може да се прилагодат на секаков вид терен, пишува Аgrarheute.
Истражувањето на научниците од Државниот универзитет во Орегон покажало дека продуктивноста на земјиштето може значително да се зголеми со комбинирање на пасењето овци и производство на сончева енергија на истото земјиште. ScienceDaily пренесува дека кај соларните панели позитивно е што даваат вредност во смисла на производството на енергија, но тие придонесуваат и за благосостојбата на животните. Им прават сенка, а тие пијат помалку вода.
Ваквите проекти во САД се зголемија за 48 проценти во текот на изминатата деценија, а сегашниот капацитет се очекува двојно да се зголеми во следните пет години. Истражувањата исто така потврдија дека растенијата што сакаат сенка можат да имаат подобар принос во комбинација со соларни панели.
Ладење на млекото
Одгледувачите на говеда од африканските земји често немаат приклучоци за струја и можат да продаваат само мал дел од млекото поради недостаток на опрема за ладење. Поради оваа причина, тие не можат целосно да го искористат потенцијалот на нивните фарми. За да им биде полесно, научниците од германскиот универзитет во Хохенхајм развија систем за ладење со соларен погон, погоден за земјоделци со мал број крави.
Системот произведува блокови мраз со помош на соларна енергија. Тежат околу два килограми и достигнуваат до средината на контејнерот за млеко. За да не се мешаат со оваа намирница, се ставаат во дополнителен сад, одржувајќи ниска температура.
„Со ваков систем, млекото може да се лади 12 часа и да се спречи размножување на бактерии“, објаснува Виктор Торес Толедо, докторанд на Универзитетот.
Овој систем веќе го применуваат земјоделците во Кенија уште од октомври 2016 година. Научниците најавија дека наскоро ќе развијат машини за молзење и чистење на соларен погон.
Извор: agroklub.com
