Земјоделската комора на Виена, развила нов локален бренд, „Градска жетва на Виена“ (Stadternte Wien) и неодамна го претставила на јавноста во собранието на градот. Благодарение на новиот бренд, земјоделските производи со висок квалитет и со виенско потекло, сега ќе бидат препознатливи.
„Градската жетва на Виена“ се темели на државно признаени сертификати за контрола на квалитетот и потеклото. Со новиот бренд можат да бидат означени само производите кои се одгледувани на виенска почва.
Виена има 645 земјоделски стопанства. Од 5.700 хектари виенско обработливо земјиште, 4.300 хектари се ораници. Производството на зеленчук се простира на 543 хектари, додека виенско вино се произведува на 637 хектари. Во рамките на 207 главно семејни земјоделски стопанства, се произведуваат 40 различни видови зеленчук. Најзастапени култури се домат, краставица и пиперка. Со 29.270 тони набрани краставици, Виена покрива 65,3 % од производството на краставици во Австрија.
„Новиот регионален бренд ќе го олесни купувањето за сите граѓани на Виена“, изјавил Михаел Лудвиг, градоначалник на Виена. „Благодарение на кратките линии на транспортот, локалните производи даваат значаен придонес за заштита на климата. Разновидните земјоделски производи, од зеленчук до вино, кои се одгледуваат на подрачјето на градот, стигнуваат свежи до потрошувачите“, објаснува Јирген Чернохорски, член на градскиот одбор задолжен за клима.
Од 1978 година, Виена започнала да ги организира сите земјоделски стопанства како еколошки, а денес се располага со 1.700 хектари еколошко обработливо земјиште.
Извор: dunav.at
