Двајца од тројца луѓе погодени од кризата во снабдување со храна во 2020 година живееле во Африка.
Речиси уште 20 милиони луѓе се соочиле со кризата во снабдување со храна минатата година, се наведува во најновиот извештај на Глобалната мрежа против кризата со снабдување со храна.
Вооружените судири и економските шокови – вклучувајќи ги и пандемијата ковид-19 и екстремните временски услови – „втурнаа“ најмалку 155 милиони луѓе во акутна несигурност во снабдување со храна во 2020 година, што е петгодишен рекорд, е оценето во извештајот, пренесува агенцијата Ројтерс.
Хуманитарната агенција, која во 2016 година ја основаа Европската Унија и Обединетите нации, предупредува дека акутната несигурност во снабдување со храна продолжила да се влошува од 2017 година, кога прв пат во својот годишен извештај укажала на криза во снабдувањето со храна.
„Мораме да направиме сè за да го запреме овој магичен круг. Во 21 век нема место за глад и гладување“, изјавил генералниот секретар на Обединетите нации Антонио Гутереш.
Двајца од тројца луѓе погодени од кризата со снабдување со храна во 2020 година живееле во Африка, иако не се поштедени ниту другите делови на светот, како Јемен, Авганистан, Сирија и Хаити, кои се меѓу 10-те најпогодени земји.
„Пандемијата ја откри кревкоста на глобалниот прехранбен систем и потребата од поправедни, одржливи и поотпорни системи“, се наведува во заедничкото соопштение на ЕУ, Организацијата на Обединетите нации за храна, Светската програма за храна на Обединетите нации и УСАИД.
Во соопштението се додава дека кризата со храна ќе се влоши ако не дојде до радикални трансформации на нашите земјоделско-прехранбени системи.
