Дека светските залихи на житарки се сè помали докажуваат високите цени на пазарот. Освен тоа, сè поголеми се и цените за претстојните жетви, а земјоделците не паметат такви вреднсоти. Тон пченица според париската берза EuroNext чини 257,75, а според Чикаго CME 236,84 евра.
Растот на цените е поттикнат од слабата жетва во САД и проблемите што ги создаде метеоролошката појава Ла Нина во Јужна Америка. Големо влијание имаше и побарувачката од Кина, која на светскиот пазар купувала повеќе пченица, пченка, јачмен и соја отколку порано поради обнова на стадата свињи.
Покрај тоа, постојат и пресврти кои ги донесе пандемијата на коронавирусот, што доведе до нагло купување и складирање на залихи во бројни земји. И покрај рекордната жетва, Русија воведе високи извозни царини за борба против инфлацијата на домашниот пазар. Нивниот пример го следеше Аргентина и низа азиски земји. Проблеми создаваат и снабдувачките центри и растот на трошоците за превоз, пишува agrarheute.
Неизвесна глобалната понуда
Понатаму, изгледите за новата жетва на пченка и соја не се баш добри. Аналитичарите веруваат дека глобалната понуда ќе биде многу неизвесна до следната есен, бидејќи некои магацини се веќе празни. Американците се во проблеми бидејќи не можат да ја исполнат својата обврска за испорака кон Кина и останатите големи купувачи, која однапред е договорена. Тоа создава шпекулации и понатамошно зголемување на цените. Следствено на тоа, тон пченка на EuroNext чини 241,25, a на CME 239,05 евра. Со зоб се тргува за 219,33 eвра по тон.
Скоро целиот американски појас каде што се одгледува пченка го зафати суша и студ, а сувото време го погоди и северот. Тука културите слабо никнуваат поради недостиг на влага, ниски температури на почвата и мраз.
Тоа овозможува цените на новата жетва на пченицата во САД и Канада да се повисоки од старите, а веќе постигнаа осумгодишен максимум. На тоа влијаеле и многу високите цени на пченката, па пченицата се користи како замена за храна на животните.
Кина купува од Франција
Меѓутоа, цените најмногу ќе зависат од темпото со кое купува Кина. Иако тамошните власти моментално проценуваат дека и нивната жетва ќе биде добра, силосите стојат празни. Затоа нивната потреба за увоз и понатаму ќе биде голема. Со тоа, аналитичарите се сомневаат во кинеските бројки и сметаат дека ретко ја покажуваат вистинската состојба.
Руските полјоделци посеаја поголеми површини зимска пченица, но студениот бран кој ја зафати оваа земја како и некои региони во Европа би можел да ги намали приносите. Повеќе од 700 хектари во оваа земја ќе мора да бидат преорани, известува тамошната консултантска компанија IKAR, која ја ревидирала својата многу висока проценка на жетвата од 81 на 79,5 милиони тони, но и тоа ќе биде добар резултат.
Повеќето аналитичари сметаат дека големата руска жетва е многу потребна за донекаде да се осигураат глобалните залихи. Проценките за Европа сè уште не се завршени, иако на пример, Strategie Grains моментално предвидува многу поголема жетва на пченица отколку минатата година. Причина за тоа се поголемите површини во Франција, каде што жетвата би можела да биде добра и покрај мразот кој тука нанесе големи штети во аграрот.
Кина од оваа земја веќе нарачала големи количини а Франција стана една од нивните поважни извори за снабдување со житарки.
Извор: agroklub.com
