Татковина на лавандата се сувите и сончеви карпи на западниот Медитеран. Ова мора да го имаме предвид кога одгледуваме лаванда, па иако не можеме да и ги обезбедите придобивките од медитеранската клима, можеме да и обезбедиме основни услови, како што е почва со добра пропустливост. Затоа, ќе ја подобриме глинестата почва со додавање на компост и остар песок. Лавандата сака алкална почва, па ако е кисела, треба да и се додаде вар.
Познати се триесетина видови лаванда. Лавандата е зимзелена грмушка висока околу 60 сантиметри и со ширина најмалку 120 см.
Најчесто се одгледува раноцветна L. angustifolia (син. L. officinalis, L. vera и L. spica), која се карактеризира со тесни сиво-зелени листови и исправени стебленца, со виолетови или сини цветови.
Примена: како покривка на почвата, за жива ограда и граничници, цветни леи, природни градини и за садење во саксии.
Напомена: Во првата година на одгледување, исечете ги цветните пупки за да поттикнете формирање на посилни корени и густа, убаво обликувана лаванда. По цветањето, лавандата се реже за околу една третина и се продолжува со наводнување.
Лавандата го добила своето име од латинскиот збор „lavare“, што значи миење, затоа што се додавала во бањите, во водата за миење лице и вода за перење како мирис и лековито растение. Нејзините лековити својства првпат ги спомнува Хилдегард од Бинген во 12 век. Според народната медицина, лековитите ефекти на лавандата се повеќекратни. Се користи како средство за миење на лицето и телото (бањи, тоалетна вода), за бркање молци, за арома и за лекување на многу болести. Маслото од лаванда има и антиревматски својства, кои се особено изразени при триење на заболените места со масло од лаванда, како и при подготовка на бањи со лаванда.
Маслото од лаванда помага при мигрена и главоболки. Се нанесува на местата каде што чувствуваме болка. Може да ставиме и неколку капки масло од лаванда на коцка шеќер кога сме возбудени, вознемирени, при несвестица, вртоглавица, наплив на крв во главата, стомачни тегоби, надуеност, грчеви на матката и цревата …
Лавандата е корисна и за одбивање на многу инсекти. Можеме да се бориме со молците со лаванда, пелин, кора од лимон или портокал, нане и рузмарин. Друга работа што треба да се знае, лавандата е едно од цвеќињата што може да се јадат, а вистински деликатес е сладоледот од лаванда!
Извор: living.vecernji.hr
