Министерството за Економија, со цел поттикнување на развој на туризмот во руралните средини предвидува финансиска поддршка при градење или адаптација на селски домаќинства кои ќе даваат угостителски услуги во согласност со Правилникот за начинот и поблиските критериуми за добивање на ознаката во селските домаќинства во руралните средини.
Финансиската поддршка во износ од 60% од докажаните трошоци, но не повеќе од 200.000,00 денари, ќе биде наменета за набавка на опрема и инвентар, реконструкција како и за уредување на просторот на селски домаќинства.
Критериуми кои треба да ги исполнат домаќинствата се: објектот да е уреден и опремен согласно традицијата на крајот во кој се наоѓа, да подготвуваи послужува топли и ладни јадења, пијалаци и напивки вообичаени за крајот во кој се наоѓа селското домаќинство, да нуди услуги за сместување (најмногу до 5 соби), надворешниот изглед на куќата да биде без оштетување и знаци на дотраеност, а околината да биде уредена. Ваквите семејни домаќинства ќе добијат ознака на која има „сончоглед―, како потврда дека станува збор за селско домаќинство во рурална средина кое врши угостителска дејност.
Со поддршка на селските домаќинства се обезбедува самовработување за лица во рурални средини и зголемување на автентична туристичка понуда, со можност за промоција на локалните вредности.
Оваа активност ќе се реализира во периодот од месец февруари до месец октомври 2021 година.
Ваква мерка пред две години искористила Катарина Георгиевска, сопственичка на капацитет за селски туризам во село Оморани „Ранчо и Ванчо на Ката“, за набавка на систем за греење.
Идејата ја имале веќе неколку години, но инвестицијата од 4 -5 000 евра сами не можеле да ја реализираат.
-Со тоа постигнавме две работи. Прво, сега престојот во зима е многу пријатен, бидејќи камена куќа без современа изолација на куќа е тешко да се одржува загреана, но со овој систем ние го постигнуваме тоа. Така да ја продолжуваме работата со сместување на гости и во зима и за разлика од претходните години, веќе забележуваме зголемен број на гости во зима. Потоа, претходно имавме поставено електрични греалки во сите соби и во бањите, но комфорната температура на долниот кат беше многу тешко да се постигне (со камин и 2 греалки) и генерално, во ходникот и бањите беше доста студено. Трошокот за енергенси кој сега го плаќаме за истиот број на денови, во споредба со претходните години е драстично помал, да речеме дека околу 40% се намалени тие трошоци, а температурниот комфор е исто драстично подобар, односно постигнат. Со овој модерен систем многу едноставно се манипулира. Ние направивме кратко видео клипче од 4 минути, им го праќаме на гостите и тие можат самостојно да управуваат со него. Нема сечење дрва, чад, непријатна миризба од нафта/гас, значи презадоволни сме од целиот комфор воопшто.
Георгиевска е задоволна од оваа поддршка на државата но потенцира дека заинтересираните треба порано да почнат со подготовка на апликацијата затоа што можно е да имаат административни проблеми во вадењето на потребната документација за аплицирање.
