Во Германија земјоделците не се откажуваат од своите барања. Тие протестираат пред маркетите поради ниските цени на земјоделско – прехранбените производи, сметајќи дека откупните цени за млеко и месо повеќе не се доволни за нормална работа на фармите.
Да потсетиме, земјоделците во Германија бараат повисоки откупни цени и тоа: 50 центи повеќе за килограм свинско месо, 15 центи повеќе за литар млеко, 1 евро на кг говедско и 20 центи повеќе за килограм живина. Поради тоа, тие започнаа масовни протести, пред магацините во трговските синџири за храна и ги блокираа млекарите и кланиците.
Овој пат главниот протест се одржа пред централниот магацин на трговскиот синџир „Лидл“ во Клопенбург во неделата вечерта. Според полицискиот извештај, околу 400 земјоделци со 300 трактори учествувале во операцијата, додека 150 возила се собрале во понеделникот.
Како што објави ГДР, други сто земјоделци предизвикале колапс на сообраќајот за да спречат испорака на стоки до продавниците во округот Харбург.
Понатаму, според сликите што кружат на социјалните мрежи, пред централниот магацин на трговскиот ланец „Алди“ во Витлих, се формираа колони камиони кои не можеа да ја достават стоката поради протестот.
Во Бремерерде, бали со слама беа поставени пред седум супермаркети.
Во понеделникот исто така се одржа протест и во Дрезден. Според тамошните медиуми, неколку стотици земјоделци со дури 1.000 трактори блокирале мостови на реката Елба и неколку пристапни патишта.
Извор: Агроклуб
