Талогот од кафе, што обично претставува отпад, може да биде и многу корисен, особено за оние кои сакаат да се занимаваат со алтернативно одгледување на растенија или печурки.
Покрај класичното производство, многу видови на печурки, во кои спаѓа и буковката, може да се одгледуваат на слама или на талог од кафе.
Според Modernfarmer, потребна ви е ситно исечкана слама, материјал за инокулација (спори, мицелиум) што се купува од специјализирани или локални производители, но исто така и талог од свежо кафе, алкохол (најмалку 70 %), садови за готвење, пластична кеса или друг вид на сад, кујнска вага и цедалка.
Смесата треба да содржи околу 70 % талог од кафе, 20 % слама и 10 % спори (мицелиум). Потребни се 2,3 кг кафе, 0,23 кг мицелиум и околу половина килограм слама за да може да се произведе количина доволно за четиричлено семејство.
Важно е да дезинфицирате сè во текот на целата постапка за да спречите ширење на несакани бактерии, а тоа ќе го постигнете со веќе споменатиот алкохол.
Промешајте ја смесата
Пред да ги измешате сите состојки, добро е да ја пастеризирате сламата. Потопете ја во врела вода и оставете ја да отстои околу еден час. Потоа процедете ја за да го исфрлите вишок на вода.
Талогот од кафе додека е сè уште свеж, истурете го во чиста чинија за мешање и додајте ја сламата. После тоа, ставете го мицелиумот во неа и измешајте сè. Ставете ја смесата во вреќа или сандук наменет за одгледување и цврсто затворете ја, а потоа направете четири дупки за воздух.
Топло и темно место
Ставете ја вреќата на топло и темно место, на температура од околу 25 ° С. Чувајте ја таму околу две до три недели. За тоа време, ќе забележите како мицелиумот оживува и расте од смесата, правејќи ја постепено бела, сè додека не ја колонизира целосно.
Можете да ставите малку сол која би требало да ги уништи несаканите микроорганизми и да овозможи понатамошен развој на мицелиумот.
Ако целата смеса во садот (вреќата) стане зелена, тогаш, за жал, вашиот обид не успеал.
Обезбедете влага
Ставете ја вреќата или сандукот на место каде што има многу свеж воздух, но и индиректна сончева светлина. Треба да ја прскате вреќата со малку вода секој ден, наутро и навечер.По една недела или повеќе, ќе забележите дека мали печурки почнуваат да растат. Во следните пет до седум дена, тие ќе се удвојат. Секој ден ќе бидат сè поголеми и помеки, и како такви ќе бидар спремни за јадење.
Извор: Агроклуб
