Француското производство на вино оваа година веројатно ќе се зголеми, а бербата би можела да започне порано од вообичаеното поради потоплото време, прогнозира нивното Министерство за земјоделство.
Сепак и во Франција како и во Италија, се обидуваат да го стабилизираат производството за да можат цените да останат стабилни, пишува Ројтерс. Според извештајот кој ја содржи првата прогноза за 2020 година се очекува производство од 44,7 до 45,7 милиони хектолитри што е пораст за 6 до 8% во однос на минатата година и нешто над просекот на таа земја за последните пет години.
Сушата би можела да ги намали очекувањата
Во текот на пролетта имаше поволни временски услови за виновата лоза иако болеста сиво гниење зафати делови во југозападните делови, а градот предизвика 30% загуби во некои делови на регионот Bordeaux.
Сушата која сеуште трае, сепак би можела да ги намали очекувањата за зголемување на производството иако топлата пролет поволно влијаеше врз растот на виновата лоза во однос на претходните години.
Можностите за рана берба им создадоа главоболка на производителите кои се зависни од сезонските работници и кои се соочија со недостиг на работна сила но и со строгите мерки за заштита во текот на пандемијата.
За регионот Champagne, од Министерството порачаа дека виновата лоза покажува добар потенцијал но напоменуваат дека треба да утврдат за кои количини се работи. Производителите на шампањско сеуште преговараат за цените на производите, а некои сакаат да го намалат производството за да се зголеми цената бидејќи пандемијата ја намали продажбата.
Да потсетиме, Франција ја зголеми финансиската поддршка на 250 милиони евра на лозарите кои се соочени со голем пад на побарувачката, откако поради пандемијата се затворија рестораните и баровите, а американските царински тарифи го ограничија извозот.
Исто така, оваа држава најави дека ќе ја згоелми и поддршката за земјоделците поради сушата.
Извор: Agroclub
