Локалната самоуправа на Кочани го почна проектот за поставување ново јавно осветлување во селата Горни Подлог, Долни Подлог и Мојанци. Градоначалникот на Општина Кочани Николчо Илијев и фирмата изведувач „Електрика“ денеска го потпишаа договорот што ќе се реализира со 60 илјади швајцарски франци обезбедени од Швајцарската агенција за развој и соработка (СЕКО).
На неодамна рехабилитираната делница од Кочани до Мојанци, како и на влезот на селото Долни Подлог ќе бидат поставени вкупно 61 челичен столб со светлосна арматура и подземен вод на каблите, со што ќе се осветли пат во должина од 2,2 километри.
– Со Швајцарската агенција за развој и соработка досега реализиравме неколку проекти, од кои посебно важна е изградбата на пречистителната станица за отпадни води. Во рамки на тој проект поврзавме уште два други, рехабилитацијата на патот до Мојанци и јавното осветлување на трите населени места. Тоа значи дека овие села ќе бидат пример како локалните самоуправи кај нас треба да одговараат на инфраструктурните потреби на руралното население, а со таква стратегија ќе ја оствариме нашата долгорочна цел за пристоен живот, и во централното градско подрачје и во другите населените места, истакна Николчо Илијев, градоначалник на Општина Кочани. Новите лед-светилки ќе бидат со максимално оптоварување до 80 вати и ќе обезбедуваат заштеда на енергија до 66 отсто. Рокот за завршување на градежните работи е до крајот на септември.
МИА
