Во текот на пандемијата од корона вирусот, конечно „увезените“ работници на европските земјоделски плантажи станаа видливи. Тие станаа „есенцијална работна сила“. Меѓутоа, шест децении наназад, за нив речиси никој не се грижел.
Според истражувањата на Еуроњуз, на овие работници не посветувало внимание ниту законодавството на ЕУ. Затоа тие останувале без заштита каква што би требало да имаат, овозможена од страна на законите поврзани со работничките права. Според зборовите на Данијел Фројнд, доскорашен парламентарец на ЕП, дури и некои животни се подобро заштитени со закони од работниците кои доаѓаат од сиромашните земји. Тие работат во земјоделството и воглавно берат зеленук и овошје и се грижат за насадите.
Имено, мигрантите кои во ЕУ работат земјоделски работи, не добиваат надомест за прекувремена работа, немаат добри услови за сместување, а многу често работат толку напорно што си го уништуваат сопственото здравје. Тие се подложни на вербални, физички па дури и сексуални злоупотреби. Ако нешто позитивно направи корона кризата во Европа, тоа е дека ја откри нивната состојба.
Сега, кога ги нема доволно за да може земјоделството нормално да функционира, јасно е дека тие се неопходни за производството на храна во ЕУ и дека нивните услови за работа мора да се подобрат.
Условите во кои работат и живеат овие луѓе, благо речено се катастрофални. Во Шпанија, мигрантите кои воедно се и сезонски работници, живеат во стари колиби закрпени со картон, без струја, вода и какви било санитарни услови. Очекувано, не добиваат ниту заштитна опрема како што се маски за лице и ракавици.
И во Франција ситуацијата не е ништо подобра. Таму земјоделците добиваат повеќе стимулативни средства отколку било каде во ЕУ, но повторно не ги обезбедуваат сите работни услови за сезонците.
Во Германија, весниците пишуваат за лошата ситуација во кланиците каде што работат мигранти од сиромашните европски земји. Тие не се соодветно заштитени, па ова гранка од земјоделството е позната по големиот број на заразени од корона вирус.
Токму поради нив, и многуте вакви слични негативни приемри, Европскиот парламент на крајот на јуни усвои резолуција со која би требало подобро да се регулира состојбата и заштитата на сезонските работниците и мигрантите. Пред пандемијата, за нив многу малку се зборувало. Меѓутоа сега се менува регулативата но и се зголемува инспекцискиот надзор.
Европската комисија издаде насоки за тоа како нејзините членки би требало да обезбедуваат почитување на правилата за здравствено и социјално осигурување на овие работници. Овој потег сепак доaѓa во момент кога веќе се чувствува дефицитот на работна сила во земјоделството.
Извор: Agronews
