Повеќе од 1.000 грла крупен добиток неконтролирано се движат низ Крива Паланка, уништуваат земјоделски насади и приватен имот и ја загрозуваат безбедноста во сообраќајот. Градоначалникот Сашко Митовски побара Владата итно да прогласи 30-дневна кризна состојба и да обезбеди ресурси за трајно решавање на проблемот.
На прес-конференција, Митовски посочи дека барањето произлегува од заклучоците на Општинскиот кризен штаб, според кои надлежните институции немаат доволно капацитети самостојно да се справат со проблемот.
„Додека институциите ги објаснуваат своите ограничувања и надлежности, граѓаните ги бројат своите загуби и штети“, порача Митовски.
Според информациите изнесени на Кризниот штаб, добитокот секојдневно се движи и низ центарот на градот, при што се оштетуваат приватни имоти и јавни површини, а се загрозува и безбедноста на граѓаните и учесниците во сообраќајот.
Градоначалникот оцени дека за надминување на состојбата се потребни дополнителни стручни, логистички, оперативни и финансиски ресурси, специјализирани возила и соодветен простор за сместување на животните.
Од Владата побара заедничка и координирана интервенција со јасен оперативен план, утврдени активности, задолженија и одговорности. Планот, според него, треба да опфати организирано заловување, безбеден транспорт и згрижување на добитокот, како и мерки за спречување на повторување на проблемот.
Митовски потсети дека од јануари 2022 година до Владата, Министерството за земјоделство, надлежниот инспекторат и Агенцијата за храна и ветеринарство биле доставени стотици пријави и иницијативи. Поднесена била и кривична пријава за мачење животни, а собрани биле докази за материјални штети, повреди на граѓани и уништување јавни површини.
Тој посочи и дека правосилните и извршни решенија за одземање животни од регистрирани одгледувалишта, донесени уште во 2024 година, сè уште не биле целосно спроведени, поради што досегашните делумни интервенции не донеле трајно решение.
Митовски го отвори и прашањето за здравствената состојба и благосостојбата на животните, барајќи информации за нивното следење, последните ветеринарни прегледи и процената на здравствените и епидемиолошките ризици.
„Прогласете 30-дневна кризна состојба, мобилизирајте ги потребните ресурси и помогнете ѝ на Крива Паланка да стави крај на оваа долгогодишна голгота“, порача градоначалникот.
