Врнежите од дожд кои паднаа изминатата недела беа добредојдени за надополнување на влагата во почвата, особено за есенските посеви. Оптималните рокови за есенска сеидба се во тек, а дел од житните култури, како што е пченицата, во некои региони веќе се наоѓаат во фаза на никнување. Врнежите во овој период се од исклучително значење, бидејќи обезбедуваат влага која е главен услов за ртење и правилен развој на семето.
Во лозарските региони голем дел од врнежите што паднаа се акумулираат во подлабоките слоеви на почвата, што е одлично за следната вегетативна сезона. Кај овошните култури, пак, во овој дел од годината потребно е да има доволно влага и на длабочина над два метри. Ова му овозможува на растението да обезбеди резервна зимска влага, поради што овие дождови имаат позитивно влијание. Во меѓувреме, кај некои доцни овошни сорти, како што се дуњите, јапонското јаболко и калинката, во тек е бербата на плодовите. Овошките имаат потреба од вода и по бербата, со цел да се кондиционираат, да презимат без оштетувања од ниски температури и да формираат квалитетни родни пупки за идната година. За постигнување висок и квалитетен принос, почвата мора да има доволно лесно достапна вода во текот на целата вегетација. Исто така, во тек е садењето на одделни градинарски култури, како и собирањето на преостанатите есенски плодови.
Препорака: Земјоделските производители редовно да ја следат состојбата на своите посеви по дождот и да проверуваат дали има прекумерно задржување на вода. Се препорачува одложување на ѓубрењето во периоди на висока влажност, за да се избегне ризикот од испирање и загуба на хранливите материи. Поради зголемената релативна влажност во зоната на растенијата, создадени се поволни услови за појава на растителни болести и штетници, па затоа е неопходна редовна контрола. Земјоделците треба будно да ја следат и тридневната временска прогноза.
Временска прогноза до почетокот на следната недела:
До недела ќе се задржи стабилно време со сончеви периоди во текот на денот. За време на викендот утринските температури на некои места ќе се спуштат под нулата, а по одделни котлини ќе има појава на утринска магла. На почетокот на следната седмица ќе има услови за слаб, локален дожд. Минималната температура ќе се движи во интервал од -3°C на повисоките места, до 9°C а, максималната температура ќе се движи во интервал од 9°C до 17°C.
Поради најавените минусни температури, земјоделците треба да преземат мерки за заштита на младите есенски посеви во фаза на никнување и на новосадените градинарски култури од површинско замрзнување на почвата. Се препорачува мулчирање или површинско покривање на почувствителните растенија со заштитна фолија (агротекстил). На тој начин ќе се зачува акумулираната топлина во почвата и ќе се спречат оштетувања на кореновиот систем од првите ноемвриски мразеви.
Извор: Агрометео
