Куманово од 2 до 4 октомври, годинава ќе биде домаќин на два меѓународни саеми, деветтото издание на саемот на органски и традиционални производи „Органска трпеза 2026“ и петтото издание на саемот за земјоделство, технологии, храна и преработки „Агромак 2026“, информираа денеска од Општина Куманово. Оттаму наведуваат дека саемите се конципирани како тридневна регионална платформа за поврзување на производители, компании, институции, општини, стопански комори, образовни и научни установи, туристички организации, здруженија и развојни партнери.
Организатори на саемите се Здружение „ЖИВОТ“ Куманово и Комора на органски производители на Македонија КОП. Саемските манифестации ќе се одржат во спортско-рекреативнит Куманово, простор пред градскиот базен.
Учесниците, зависно од дејноста и интересот, ќе можат да се вклучат како изложувачи и продавачи, програмски учесници, носители на програмски столбови, зони или партнерски павилјони, како и преку B2B, B2I и партнерски средби. Предвидено е учество и на институционални и стручни партнери, како и покровители, спонзори и поддржувачи.
Целта на саемските манифестации е промоција на производи и услуги, воспоставување деловни контакти, размена на искуства и знаења и отворање можности за нови партнерства и соработка во земјоделството, производството на храна, преработувачката индустрија и сродните области. Рокот за пријавување е до 20 септември 2026 година. Општината и организаторите информираат дека бројот и распоредот на изложбените позиции се ограничени.
МИА
